Afficos

di Benito Saba (2007)

Agguantu meda in bértula apo postu
pro attulare terrinu in sos anneos
e bettare s'abbarzu in sas peleas
de s'abbunzu 'e rebattu totu imbertu.
Da' cappa affïanzadu 'e baliadura
astraos rangulende 'e ingannia
laorzadu apo allinzos e isperas
in sa 'iddia 'e chelu imbidrïadu.
Como isetto beranu... e s'incunza...
ma custu afficu meu est taruladu
da' sa duda funguda chi s'astore
de sa venga malésiga a s'accua
bicculadu at su ranu ingraïdadu
da' fïamore 'e tempus benidore...
Arressare non poto fadu e sorte,
ma si cheret s'ostinu annada mala
apo torra a chertare tirrïosu!

Benito Saba (Omine sardu)

Aspettative

Nella bisaccia ho riposto molta sopportazione / per preparare nei crucci il terreno alla semina / e tracciare nelle pene il solco d'irrigazione / dell'acqua torbida di affanno ben celato. /
Avvolto da mantello di pazienza / sopportando gelate di delusione / ho coltivato attese e speranze / nella brina ghiacciata di cielo vetrificato. /
Ora attendo primavera... e il raccolto... / ma questa mia aspettativa è tarlata / dal dubbio profondo che lo sparviero / dell'invidia maligna furtivo / abbia becchettato ad uno ad uno il seme ingravidato / da passione di futuro... /
Non posso fermare fato e sorte, / ma se il destino vuole che sia annata cattiva / nuovamente lotterò caparbio e tenace!

Annotadura
Sa poesia "Afficos" – chi si podet relatare a sa chistione 'e s'ingiustissia sotziale (su trabagliu no est recumpensadu cun sa frùtture sua, ca sa venga de chie non cheres teraccare chircat de t'arruinare pro favorèssere àtere; ma bisonzat non s'arrèndere mai, comente deghet a s'ómine sardu!) - est iscritta in su faeddu logudoresu 'e su Meilogu (s'antigu Mediulocu), in ue sun sas biddas de sas cussorzas de Bonorva - connota dae su carabineri Peppinu Mereu chi b'at vívidu in su 1894/5 - (Cossoine, Giave, Mara, Padria, Puttumajore) e de Thiesi (Banari, Bessude, Borutta, Bunnannaru, Cheremule, Mores, Siligo, Turarva). Custu faeddu s'assimizat meda a sos limbazos de Othieri (a oriente) e de Ittiri (a otzidente) e cussorzas issoro, chi sun a làcanas de su Meilogu.

Questa poesia ha conseguito il 1° Premio al Concorso Letterario Poesia Sarda "Peppino Mereu" - Tonara - 2007