Afetos
de Peppe Montesu

Mantesos sezis in su coro meu
afetos chi teniapo a fiancu
a vois nessi cunfido a su mancu
su dolore ‘e sa vida chin s’anneu
amicos fortes de su tempus feu
e de sas oras chi no ana arrancu
mancari mudos mi sezis d’imbaru
denne a su coro cunfortu e riparu.

Vacheddu de sa vida ch’est finida
lacrimadorju ‘e s’anima dolente
sos solos mios cumpanzos de mente
chi mi mustrades inumbe est s’essida
vois mi addulcades sa partida
oramai arrivada a su presente
deo so barca vois sezis faru
ch’illuminades su portu prus caru.

In su tempus chi finit vois dades
Ispera e fide chin caente alenu
su batitu ‘e su coro si est lenu
amorosos deretu l’azudades
in s’iscuru falanne mi mustrades
sa lughe de sa note chi vidides
chin bois solu sico a caminare
chircanne cust’istrada terminare.


Maju, 2016