Aeroplanos de pabilu
de Franco Piga

In aeras de gherra
aeroplanos mando
totu fatos de paghe e de pabilu,
ch’isterran unu filu
de lughe, lis cumando
gai chi senset ogni cuntierra.

Chi sigan sa currente
e totu sas istigas
de chie cheret, pregat s’onestade,
gai chi s’amistade
sintzera chentza brigas
totu proen in bene e dignamente

E bi ‘eten laore
in terras ch’an brujadu,
a consolare biddas e tzitades,
chi s’abbratzen che frades
e lu traten s’aradu
betende umpare semene e suore.

E netas sas aeras
chi torren e amigas
chentza luas, ne armas, ne fumore,
e siat cun s’amore
chi crescan sas ispigas
pro chi sian de paghe sas messeras.

E torren criaduras
in bratzos de sas mamas
a retzire carignos e consolu,
curran chen’oriolu
e bombas ne fiamas
pius non bidan, ne morte o bruturas.

Iseto in coro meu
chi torren bonas noas
in alas de pabilu totu iscritas,
e sempre beneitas
mustrendelas sas proas
atraessen su mundu totu intreu.

Menzione d’onore - Premio “ Caragnani” Seconda Edizione 2015 - Calangianus, 12/03/2016