Adiu Nugoro adiu
st ora e ti lassare
pena mi est a tuccare
in coro no m’essit biu

Adiu amada Nugoro
pienu so de dolore
su nuscu tou e sapore
mi leo serradu in coro

Adiu cittade mia
chin su santu Redentore
adiu via Majore
de sa bella pizinnia

Adiu amadu monte
e roccas mias adiu
finamente chi so viu
sezis su meu orizonte

Adiu tocu e campana
de sas turres de cresia
cussas de Santa Maria
chin sa melodia arcana

Adiu astrintos caminos
de Seuna e Irillai
chin Mughina e Biscollai
bos apo in ojos ladinos

Adiu amicos e frades
de joccos e cumpanzia
sos sognos bellos c’aia
de afiu los bagnades

Adiu no isco canno
ainoghe apo a torrare
de piantu apo a prenare
sos rios a umbe anno

Adiu amada bellura
chin sos pilos aneddados
sos amores impinnados
lasso inoghe chin tristura

Adiu terra natia
De babu e jajos mios
Sos dolores e afios
M’ana a fagher cumpanzia

Frearju, 2016