Abba
Salvatore Pintore

Finamentas chi m’as’a iscurrere
lestra in sas venas
in sos chirrios de sa mente
o ancora pius a làcana
in sos ojos abbertos de su presente
t’app’aere isposa promissa
frisca e serena intro ‘e sa carena
comente ala de su respiru
subra sas laras de su risu
che lentore subra sas pedras
cussumadas dae pessamentos
e dae passos in erva.

Finas a cando as’a istare in domo mia
ospite pretziosa in su riu de su tempus
app’a intendere su sabore de su diversu
e finas tue affacca cussa differentzia
chi creat s’ispantu e su saltiu
un’ojada pius manna
resistentzia infinida...

Finas chi m’as’a iscurrere in su telarzu de sa vida
puru pius pasida
ma gárriga de mundu e de entu frimmu
guvernada dae cussa rocca sibemolle de su coro meu
chi de sulu in sulu tancat e abberit sas jannas
as’a essere vida chi si donat e m’iede
finas sos segretos pius cuados
custas peraulas lentoradas de amore.