A Ulassai
di Giovanni Loddo

Oe in mente mia appo pensadu
De dedicare unu sardu cantu
A sa terra natia ue so nadu
Sa chi tenia in coro e amo tantu

In mesu ‘e sas montagnas che matrona
Ulassai, famosa bidda mia,
Vigilada ‘e Masseu e Sassa Bella

Notte e die ti vaghen sentinella
De vigilare a tie ana in dotte
Ti faghen sentinella die e notte
Ana in dotte de vigilare a tie
Sentinella ti faghen notte e die
Messes e annu e seculu intreu

In mesu ‘e sas montagnas che matrona
Ulassai famosa bidda mia
Vigilada de Sassa Bella e Masseu

As de bellesa casta ogni recreu
De donos de grandesa meda vasta
Ogni recreu as de bellesa casta
Meda vasta de donos de grandesa
Ogni recreu as de casta bellesa
Chi d'ogn’unu ti narada «imbiada!»

In mesu ‘e sas montagnas che matrona
Ulassai famosa bidda mia
De Sassa Bella e Masseu vigilada

In sa Sardigna intera ses vantada
Digna dae natura andas fiera
Ses vantada in sa Sardigna intera
Dae natura andas fiera e digna

Ses vantada in s’intera Sardigna
Pro donos de virtude e maestria.

In mesu ‘e sas montagnas che matrona
De Sassa Bella e Masseu vigilada
Ulassai famosa bidda mia.

As'un’arcana grutta ch’es nodia
De epoca lontana senza dutta
As’un’arcana ch’es nodia grutta
Senza dutta de epoca lontana
Chi es nodia as'una grutta arcana
Piena de misteru e buiosa.

In mesu ‘e sas montagnas che matrona
Vigilada ‘e Masseu e Sassa Bella
Ulassai bidda mia famosa.

As dadu vida a zente virtuosa
Calchi fizzu eccellente as'allevadu
A zente virtuosa vida as dadu
As'allevadu calchi fizzu eccellente
As dadu vida a virtuosa zente
Chi tant'onore t’ana resu assai.

In mesu ‘e sas montagnas che matrona
Vigilada ‘e Masseu e Sassa Bella
Famosa bidda mia Ulassai

A non ti dare vantu candumai
Deo unu cantu ti chelzo intonare
E candu mai vantu a non ti dare
Deo ti chelzo intonare unu cantu
E candu mai a non ti dare vantu
Che fizzu ‘e sa natia Mamma ona.

Vigilada ‘e Masseu e Sassa Bella
Ulassai famosa bidda mia
In mesu ‘e sas montagnas che matrona.

Invidiada in s'ozzastrina zona
Che una Fada o Signora Divina
Invidiada in sa zona Ozzastrina
Che Signora Divina o una Fada
In sa zona ozastrina invidiada
De abba bona e pura non ti lagnas.

Vigilada ‘e Masseu e Sassa Bella
Ulassai famosa bidda mia
Che Matrona in mesu e sas montagnas.

Spaziosas sas tuas campagnas
E sas cascadas duas ispumosas
Sas campagnas tuas ispaziosas
E spumosas sas cascadas duas
Spaziosas sas campagnas tuas
Pienas de Nuraghes de ogni pesu.

Vigilada ‘e Masseu e Sassa Bella
Ulassai famosa bidda mia
De sas montagnas che Matrona in mesu.

Si calchi isbagliu in sa musa agatades
I bos prego de coro ‘e mi scusades.

(1953)