Tore Senes non t’apo pius intesu
dae cuddas dies de lampadas
sas chi t’an garrigadu dolu e pesu.

Ja poto immaginare coment’istas
ma si t’afogas como in sa tristura
narami Tore, nara, ite nd’achistas?

Est fata gai s’umana natura,
est fata gai onzi cosa terrena,
ca solu s’anima at eterna dura.

E ca naschimus po dolu e po pena
ti l’at già nadu s’antigu poeta,
raridade est po nois s’ora serena.

Unu cumbidu lassa chi ti feta:
pedili a sa musa ’e sa Poesia
chi ti preparet carchi ora lieta.

Lassa chi currat tando fantasia
chi olet in artu chin sas aes,
po ch’abrandet tristura e tribulia,

t’allizeret sos momentos graes,
e-i su donu chi as in podere
de s’illelviu ti frunat sas giaes.

Pensa tando ca as unu dovere
de fronte a tota sa Sardigna
e primu ancora a fizu e muzere.

Para petorra a sa sorte maligna,
poneche sa tristura in fundu ’e coro
pro chi bivan sos bios vida digna.

Non penses Tore ca deo l’ignoro
su ch’as passadu tue, ma coraggiu,
de su chi restat faghende tesoro.

Sa familia nde det aer vantaggiu
si t’idene pius tranquillu e serenu,
ca de sa vida est longu su viaggiu!