A Tiu Peppe Concas cun istima
di Minnia Pani

Cumpridu sezis e sempre carosu
de versos augurales e cumpridos
lughente che isteddu lugorosu
de brocadu doradu sun bestidos
de su valore ostru decorosu
rimas chi tocan intragn’ e sentidos
cun custas rimas bella ripetidas
in coro las intendo impremidas

Su coro m’azis postu in allegria
cando bos’ apo idu fitianu
ma istende in bona cumpagnia
e magari siedas antzianu
su degheoto fit de santadria
pighende in s’iscala su manzanu
chiberu che canna a passos mannos
che unu piciòcu de vintannos

Pro sos amigos benit naturale
rispetu umiltade franca mesa
ma finas bois sezis ospitale
sa bona cara mustrat gentilesa
e pro me custu est unu signale
chi muntenet sa lumera atzesa
de s’ istima sintzera sempre ia
cun bois e Luisi cun Maria

Si custa est antiga sa cultura
marghine siat o su logudoro
s’afetu pro s’amigu m’est premura
alet che richesa unu tesoro
sos valores sunu de natura
che raighinas viven in su coro
s’amigu cando s’ateru s’abbratzat
e ‘ogni malumore che li catzat

S’istimatzione est una grandesa
sa frisciòne fiorit pomposa
dende cossolu finas in betzesa
cando lughet in coro lugorosa
vivende sa vida in cuntentesa
issa dat vigore a ‘ogni cosa
e totu custu si narat amore
bos ricambiat s’istima finas Tore.

Otieri, 08- 12- 2011