A sas collegas mias de s’Iscola Primaria de Iscanu
di Antonio Piras

Unu saludu caru
est pretzisu ch’imbie
ca l’isetan ch’iscrie
duas rigas.

Cun peraulas amigas,
de afetu, sintzeras,
umiles, verdaderas,
bos saludo.

Sos ammentos no istudo
ma los tenzo apuntados
cussos annos colados
tot’umpare.

Chie s’at a pasare
ca est acant’a finire
si nde potat godire
a dogn’ora!

Chie restat ancora
fetat bonu caminu
cun su Verbu Divinu
a costazu!

Afrontade su ‘iazu
a piaghere, a disizu,
sena tenner fastizu
ne traschia

ma in bon’armonia
che tra sorres e frades.
Comente disizades
chi siedas!

E imbater potedas
de sos chentu a sas chimas:
pote iscrier duas rimas
de amparu!

Unu saludu caru…!

Maestro Ninni
In Iscanu, 20-07-2009