A Paulu, fizu istimau
di Franceschino Satta

Ti fipo isettande Paulu meu…
bi n’hat cherfiu a ch’arribare!
Intro ‘e s’anima mea
b’hat sempre bulluzzu
tintu de arrenneghu e di milli gheleas.
Forzis l’ischis
sas bramas chi mi lassan
sos toccheddos de su coro!
Ma non mi podes azudare…
Forzis cras
resesso a ti narrer sas penas
chi mi bruzian s’ispiritu.
Tue l’ischis…amare cheret narrer
regalare frores de cossolu
a sas bramas de s’immensidade.
Tue ses semper chin mecus
chi semper nutro pro tene
galanias de beranu.
Sa pratta ‘e s’anima
est semper ligada a sos pintos de su coro
chi iffroscan suzzos de meravizas
tra glorias e sonnios de pache bera.
E dego isto a mi sinnare
pintandemi delizias chi hapo perdiu…

Babbu, Aprile 2001