A Paulilatinu
de Salvatore Deligia

Ispratu ses a pizzu e una collina
Zircundadu ‘e campagnas rigogliosas
Seculares ulias, e ilighes’umbrosas
E funtes, de abba frisca cristallina.

T’affazzas a su pranu campidanu
E a s’artu montiferru entosu
Dae su tou paisazzu donosu
Miras su Ennargentu dae lontanu.

A t’ider-in beranu ses un’incantu
Ca sa natura a festa t’hat bestidu
De onzi razza e fiores abbellidu
Chi faghes maravizza e ispantu.

Famosu ses po Santa Cristina
Ca cunservat millennios de istoria
De sos tuos antigos sa memoria
Inzegnosos e de mente suprafina.

Su Cantaru Mannu maestosu
Cun Eva, chi nos’indicat sa vena
Attorniadu sempre ‘e zente amena
In chirca de incontros e de gosu.

Fama has tentu pro sa poesia
De Prantaferru, tantu lumenadu
Versos ironicos nos hat lassadu
E ateros pienos de malaconia.

De tottu nois, ses babbu e mama
Aprigu e iscudu in amargura
De onzi fizu ti leas cura
Che pastore de sa propria ama.

Su 25 e Sant’Andria 2004