A Franzischinu Satta
di Ciccu Ortu

Si mi ses un’amigu, mai manches
de mi mandare novidades tuas:
in giambu ’e una, mandaminde duas
e de m’iscrier mai non t’istanches.

Isco chi has abertos sos penseris
e podes esternare altos cunzettos
che de sa vera musa han sos derettos
e non che zertos de partos lezeris.

Si m’iscries, cuss’ora m’infiamo
de tottucantu cudd’ardore antigu
chi oe galu perservero e bramo.

Eo lu nutro, e sustenzo s’afficcu
chi sias sanu, carissimu amigu
est custu solu su chi bramat Chiccu.

Tonara, 25 de triulas 1992