A Luigi Ladu
di Michele Podda
(A cando su FORUM?)

Si puru non ti connosco in pessone
de coro ti nde fato cumplimentu
ca isco bene s'intertenimentu
lumenande poetas e cantones;

contos e poesias a muntones,
poetas iscritores pius de chentu,
Sardinna e Mundu ziras che su bentu
noas porrinde e informatziones.

Po s'annu nou tenzo unu disizu:
chi totu cussos, mannos e minores,
donzi resone la oghen a pizu

nande de limba, versos e errores,
averguande o dande cussizu
po befes e iscaddos e onores.

Ja lu cumprendo, chi bi cheret corazu; e mencari gai mi diat aggradare abberu, unu FORUM po nos chistionare de BANDOS e de PREMIOS de poesia e de prosa; de COMITAOS e de ZURIAS; de TEMAS e de calesisat argumentu de LIMBA e POESIA. Po mezorare, si esseret a modu!