Sardigna: Ispera!
di Costantino Longu

1

Sardigna, ispera chi cust’ attuale
tempus de disisperu e de turmentu,
pienu de ogni brutta violenzia,
tenzat in presse su cambiamentu;
s’ idat de paghe vera su signale,
si vivat dignamente s’ esistenzia,
senza esser che oe a su revessu
in dogni ramu s’ idat su progressu.

2

Sos giovanos chi sun disoccupados
e chi de tribagliare tenen brama
s’ impiegu l’ agatten decorosu;
a los viver, su babbu e-i sa mama,
invece oe s’ iden obbligados
in dun’ istadu trist’ e bisonzosu:
nde fettan de s’ ischire bonos usos
senza restare che oe delusos.

3

Dogni babbu de famiglia seguru
tenzat sempre pro sos teneros fizos
su pane beneittu de ogni die.
Dogni mama cun bonos contivizos
non lu connoscat su bisonzu duru,
sa famiglia l’allevet rie rie;
non lis andet su tempus a contrariu,
mai lis manchet cant’ est nezzessariu.

4

Ue attraessan assassinos viles,
ch’ an totu malas sas intensiones
semenande piantu, luttu e dolu,
ischertien allegros sos anzones
ben’ attatos acculz’ a sos cuiles
e sas columbas si pesen a bolu:
simbulos pro sa zente tota canta
de innossenzia e de paghe santa.

5

In sas roccas chi sun insambenadas
ue b’at curtu sambene innozzente
si piantet sa rughe beneitta;
vivat sempre in cuncordia sa zente
ismentigande sas iras passadas
odiu no esistat né vinditta:
totu sos oios si resten assuttos
senza piangher pro crudeles luttos.

6

In sos campos chi sun in abbandonu,
sos trattores, mostros de attarzu,
aren bene, si coltivet laores;
in sa tuvucca e in s’ asprinarzu
si produat su fruttu pius bonu
inue ispinas b’ at crescan fiores:
su massaggiu sa terra la manizet,
dogni cabula de issa fertilizet.

7

Da’ sas basciuras a su Gennargentu
si trasformen sas terras isolanas,
sas annigrinas e-i sas bedustas;
s’ intendat dae sas baddes solianas
de macchinas potentes su chimentu
ghiadas dae sas manos robustas:
sos omines a gara contribuana
fainas a cumprire chi produana.

8

No acchippan sos mastros desulesos
a produire sonazas e traccas
sas bamas pro ferrare in sas cussorzas;
sas tancas sian pienas de accas,
in iscuderia sos bitellos presos
approendados in manigadorzas:
andande dogni annada a sa eretta
latte tenzemus de avansu e petta.

9

Cun su triunfu de ogni bona idea,
dognunu in su sou mestieri
siat serenu, cuntentu e attivu;
siat unu festosu cantieri
in dogni campu, sa Sardigna intrea,
de lamentu senza b’aer motivu:
siat pro totu sa novella edade
de benessere e de tranquillidade.

10

Nois sardos non sighemus ancora
a restare delusos e traitos
cambiamentos isettande invanu,
ma fattemus ch’ in sos nostros granitos
ispuntet luminosa s’ aurora
sa chi profetizesit Bustianu:
cuss’ aurora, sa pius lughente,
ispuntet prestu pro sa sarda zente.

11

Che giardinu de paghe in su futuru
tue resultes, oh Sardigna mia,
comente deo ti lu profetizo;
non si bonifichet sa terra ebbia,
sas cussenzias si bonifichen puru,
primma de morrer custu est chi disizo.
Cust’ umile cantone pro ammentu
sò lassande che meu testamentu!

Bolotana, 4/10/1978