Ecco torradu de nou austu,
pro sas campagnas nostras est traschia,
a sos ch’ apo connotu in pizzinnia
assimizare non lu poto custu.

Tando fin in sos montes sas arzolas
impreande chiliros e treuttos,
como invece sos fogos alluttos
distruen sas ricchesas sardignolas.

De sa Sardigna cuntemplo sos sartos
comente sun passandelos a fogu,
est fumu e nieddore in donzi logu
dae sos campos a sos montes artos.

Piantas seculares e minudas
sun distruinde in sos birdes littos;
sos montes chi fin primma buscos fittos
como mustrande sun sas roccas nudas.

Sunu sas tancas in colore brunu,
isperdinde che sun sas menzus cosas:
sas olias, piantas valorosas,
sun sas pius chi foghizande sunu.

Sos antigos cun canta passione
allevados los an sos olivarios,
invece como sos incendiarios
los sun faghinde a unu carbone.

Ruttas in terra sas arbures graes
paren nende: “S’ attimis bonu fruttu
proite su fogu nos azis alluttu
brusiandenos goi truncu e naes?

Como chi semus goi brusiadas,
pro su poberu e pro su padronu,
non prenides de s’ ozu pius bonu
lamones mannos e mannas pinzadas.”

De cust’ isola nostra, custu est zertu,
sos ch’ usan’ in s’ istiu su lominu,
invece ‘e nde formare unu giardinu
nde cherene formare unu desertu.