Aurora de Aprile
Costantino Longu

Sun dae s'aurora illuminadas
sas baddes totu e, in dogni costa,
unu puzone a s'atteru risposta
est dende cun sas notas moduladas.

E su lentore, lagrimas faladas
paren dae su chelu a bell'apposta,
pro cummover sa zente cori tosta
ch'ogni bellesa cuntemplat debbadas.

Isparinde sos ultimos isteddos
sun in su firmamentu, ca ispuntare
su sole devet:in sos rizoleddos

s'abba lughida solet murmurare,
e sos pius suaves bentigheddos
faghen sas friscas frunzas tremulare.