A ti’ Antoneddu ‘Eriu
Di Costantino Longu

(Pro su chentenariu)

Tiu Leppedda, Filumena Pireddu
cun Gasparru passadu ana sos chentu;
su numer’ est andande in aumentu
oe bi sezis bois ti’ Antoneddu.

Fra sos ch’ ana sos chentu superadu
ti’ Antoneddu sezis su quartu
e in custos bighinados de artu
totos battor sa vida azis passadu.

Custas rimas bos lezo solamente,
bucc’ a cantare non si nd’ ispalancada,
ma si ch’ istat su fizu chi bos mancada
sa festa fit bistada differente.

Bois non fizis mancu unu gigante
prosperu e robustu de persone,
però sanu de costituzione
e pagu de sos vizios amante.

Sempre sezis bistadu goi lanzu
ma energicu cun mossas abbistas,
sos duttorese cun sos farmacistas
da’ bois ana tentu pagu alanzu.

De su tribagliu affrontadas sas lottas
las azis sempre cun pagu riposu,
però mai bistadu amantiosu
sezis d’ imbriagheras e rebottas.

Fini pienos sos tempos passados
prus de oe de duros contivizos,
ma intantu sos bostros sette fizos
cun onore los azis allevados.

Sempre cuntentu in sa pobertade,
ca bos apo connotu che bighinu,
però a fizos bostros, su caminu
lis azis imparadu ‘e s’ onestade.

E difattis sa via ana sighidu
cudda chi dae bois an connotu;
da’ fizos, fizas e nebodes totu
in custa die sezis assistidu.

Dae su millenoighentos e noe
annos passadu ch’ an sessantaduos,
muzere ostra e sos affettos suos
a bois cumpanzia faghet oe.

Si de sos annos chi che sun passados
in cust’ istante ammentades su cursu,
in sa ostra cussenzia rimursu
non nd’ azis pro sos males operados.

Forsis pro cussos meritos ebbia
de custu premiu istadu sezis dignu;
non l’ azis tentu s’ istintu malignu
d’ odiu, d’ ira e de traitoria.

Si torreren sos ch’ azis fattu in vida,
pro sa ostra passada fama ona,
bos ponian in testa una corona
d’ innozente ghirlanda fiorida.

Tando non fit s’ iscola obbligatoria
a tempos bostros, ma non fizis legu;
lezinde bos bidia pro ispelegu,
dotadu fizis de bona memoria.

De liberos, cantones e giornales,
appassionad’ a sa lettura fizis,
ca liera fit sa vista, non tenizis
nezzessidade de sos occhiales.

Su arrivare a custu traguardu
zertu non fizis istravissiadu,
bois fumaizis, però moderadu,
su zigarru toscanu e-i su sardu.

Narana totu chi a su catarru
est suzetta sa zente fumadora,
eppuru bois fumades ancora
a fog’ a intro su mesu zigarru.

Semus che pellegrinos in su mundu,
su tempus tropp’ in presse si che olada,
a bois custa die bos consolada
ca cominzades seculu segundu.

Cantu sun bellos cussos pilos canos
ch’ an connotu dulzuras e affanos,
cantu est bellu un’ omin’ ‘e chent’ annos
chi ancora sa vida l’ at in manos!

Connoschen su prus donu preziosu
sos chi che bois a cust’ edade durana,
difattis, a chent’ annos augurana
cando s’ unin s’ isposa cun s’ isposu.

Bois chi tra sos pagos predilettos
sezis da’ sa divina provvidenzia,
sigat ancora sa ostra esistenzia
circondada d’ istimas e d’ affettos.

Bolotana 1971