A mamma
di Costantino Longu

Dotada fis de bonos sentimentos,
esemplare de mama santa e pia;
de domo s’ ornamentu, lughe e ghia
e alliviu a sos nostros patimentos.

Umile fisti, de raros talentos
morta tue est morta ogni allegria;
ammentandenos de cando fis bia
rimpianghimos sos caros momentos.

Immersos in su dolu pius profundu,
affligidos cun penas e fastizos
restamos pianghinde derelittos:

oe, ca prusu non ses in su mundu,
supportana sos tuos caros fizos
amaras penas in custos abìtos.

==========

De te, mama, su caru sembiante
est imprimidu in custu coro meu;
dae cando ses morta, cun anneu
deo vivinde sò a dogn’ istante.

Umile tue fis, chi sa penante
mia vida mudaist’ in recreu;
ahi! ite colpu terribil’ e feu
rezzid’ apo in su fatale istante.

Ite pena terribile chi est custa,
a mi bider, meschinu, tot’ in duna
ruttu in sa disaura pius gravosa:

osservo chi sa sorte est tropp’ ingiusta,
suspiro pro sa mia disfortuna,
affligidu ca mama est posta in losa.

Bolotana 1929