Rotary Club Bosa

Amm.ne Provintziale de Aristanis

----------------------------------------------------------------------00000---------------------------------------------------------------------------

BANDU DE CUNCURSU

Su premiu de poesia “S’ISCIAREU” est naschidu in Frussio cun s’intentu de istituire, finas in Pianalza, un’importante ricurrentzia culturale netzessaria pro sa ripresa e s’iscoberta noa de sas raighinas de unu populu singulare che-i su nostru chi possedit una limba de caratere e de poesia.

SETZIONES

Su premiu previdit duas setziones:
- sa prima est titulada: “Sonettos ineditos”. Su poeta depet imbiare unu sonetto solu. Si benit imbiadu pius de unu sonetto, su poeta benit esclusu da e su cuncursu.
- sa sigunda est titulada “Ottadas”. Sas ottadas depent essere a su massimu battoro e unidas in su matessi tribagliu (poesia). Si benit imbiadu pius de unu tribagliu, su poeta benit esclusu da e su cuncursu.
Su tema de sas poesias est liberu.

PRESENTATZIONE DE SAS POESIAS

Sos tribaglios depent arrivare, in 8 copias a sa segreteria de su Comune de Frussio, via Nazionale n.43, 08010 OR intro de su trinta de Cabidanni (30.09.2011) e depent esser frimmados cun-d-unu nomene inventadu o paralumene e serrados in-d-una busta manna chi a fora depet tennere su matessi nomene e sa setzione de partecipatzione. Intro sa busta manna depet esser posta una busta minore, serrada, cun sas generalidades de su poeta, s’indiritziu de domo, su numeru de telefono (cellulare) e E-mail.(posta elettronica, si sitenet, ma non est obligatoria)
Pro motivos ligados a sa publicatzione est agradessida, ma non est obligatoria, sa tradutzione in italianu.

GIURIA

Sa giuria est cumposta dae: Su Sindigu ‘e Frussio Alessandro Carta (rappresentante de S’Amministratzione Com.le), Augusto Piras (presidente), Paolo Pillonca (critico-editore), Antoni Maria Pinna (poeta), Salbadore Murgia (poeta), Chirigu Falchi (contadore e poeta), Gigi Piu (poeta e cantadore), Angelo Ardu (espertu locale de poesia), Maria Giovanna Carta (segretaria).

Sa giuria detzidit, pro ogni setzione, cales sunt sos tribaglios binchidores de su primu, sigundu e tertzu premiu, sos mentzionados e sos signalados. Sa detzisione non podet esser mudada.

AVERTENTZIAS
- Sas poesias non depent esser bistadas premiadas in ateros cuncursos o mustraduras e nemmancu publicadas.
- A leare parte a su cuncursu est a s’indonu e non benit pedida tassa peruna.
- Un’autore podet leare parte finas a ambas setziones, ma semper rispettende sas cunditziones de ogni setzione, imbiende bustas cumpletamente separadas. Su matessi poeta non podet esser premiadu in più de una setzione.
- Sos tribaglios non benint torrados e su Comune de Frussio si reservat ogni diritu de los pubblicare cun su cuntributu de su Comune de Frussio, de sa Regione, de sa Provintzia de Aristanis e de su Rotary Club de Bosa, finas in sa radio, in televisione o internet, sena pagamentu perunu de diritos. S’autore abbarrat proprietariu de su tribagliu chi at iscritu.
- Leare parte a su cuncursu cheret narrere chi si atzetant sas cunditziones numenadas in sos puntos de innanti.
- Sunt ammissos a su Premiu tribaglios iscrittos in-d-ogni variedade de sa limba sarda, finas in limba sarda comuna.

PREMIOS

Su primu, sigundu e tertzu de ogni setzione ant a binchere unu premiu in dinari, a sigunda de sas possibilidades; sos atteros premiados ant a retzire un’attestadu e premios d s’Amministratzione comunale de Frussio;

Sos poetas assentes sena motivu no ant a retzire sos premios assignados chi abbarrant de propriedade de su Comune de Frussio;

Sa Premiatzione at a esser su 17 de Nadale, festa de “Su inu Nou”, a sas tres e mesa de sero in su salone de su “Centru de Agregatzione”. Totu sos binchidores ant a esser avisados cun tempus. Est aggradessida sa presentzia de tottu sos partetzipantes a su cuncursu. A pustis de sa premiatzione in su situ Internet de su Comune de Frussio: www.comune.flussio.or.it. ant a essere pubblicados sos tribaglios premiados.

Bos saludamos de coro e ischedas chi sa vida e sa fama de su Premiu “S’ISCIAREU” dipendet dae sos versos bostros e dae sa presenzia e participatzione bostras.