In
ammentu de Armando Piras (da sardegnaeliberta.it)
In Nugoro si ch’est mortu Armando Piras
di Tonino Bussu
Martis manzanu
in Nugoro si ch’est mortu Armando Piras, naschiu in Bitti, ma
paschiu in Nugoro inube bibiat dae meda tempus.
A faeddare de Armando est a a faeddare de un’amicu corale chi
s’est semper impignadu anima e coro in sos temas de sa sardidade
e at fattu in modu chi sas menzus tradissiones sardas las esseren potias
connoscher in totuve, dae s’Italia a s’Europa e in medas
ateras partes de mundu. Sa passione manna sua fit pro sa Sardigna e
pro su populu suo e pro sa cultura sarda, pro su canticu, su ballu,
su folclore cun totu su chi zirat affurriu, ca isse bidiat in sos canticos
a tenores s’espressione prus originale de sa cultura sarda e nde
fit meda orgogliosu e at tentu sa soddisfazione de bier sa die chi s’UNESCO
at dichiaradu su tenore sardu patrimoniu de s’umanidade. Pro issu,
e puru pro nois totus sos chi amus cumbattiu una gherra manna pro sa
defesa de sa cultura sarda, fit una vittoria de importu mannu ca, prima,
pacos fin sos chi apretzaban su tenore: sa voche, sa mesu boche, sa
contra, su bassu; totus nomenes chi Armando ispiegabat unu pro unu pro
facher cumprender a sardos e istranzos sa ricchesa de sa cultura nostra
chi medas non cherian, chi medas che la ponian in secus de sa janna,
belle brigonzandesi de esseren sardos.
Como sunu medas de prus sos chi si dedican a sa cultura sarda, a su
canticu a tenore e est puru meritu de Armando chi, tra sas ateras cosas,
at incorazadu e direttu su tenore chi at dedicadu a s’amicu Angelo
Caria. Custu tenore est una de sas creaturas de Armando, ma arrastos
de sa passione sua pro sa terra sarda, pro sa Sardigna los azapamus
in medas iscrittos, in rivistas e quotidianos inube issu at semenadu
campos de cultura sada e como fit zai bidende sos fruttos galanos de
su triballu suo. Sa morte sua nos dispiachet meda ca fit una pessone
de animu bonu, de bonu coro, de grandu impignu politicu comente dirigente
de su Partidu Sardu e in sa confederatzione sindacale sarda: cantas
peleas e gherras paris pro su partidu, su sindacadu, su populu sardu
e pro sa defesa de sa limba e de sa cultura nostra!
Pro totus cussas peleas a mene mi dispiachet puru a titulu pessonale
ca a Armando l’appo connottu bene siat in s’impignu politicu-sindacale
siat in su traballu suo pro s’europeade e pro su folclore sardu.
Pro totu custu, chi est nudda in cunfrontu a sas battaglias fattas in
sos barant’annos e prus chi nos connoschiabamus, da parte mea
imbio sas condoglianzas a sa famiglia de Armando pro lis ponner corazu
e pro ammentare a Armando chi fit connottu, respettadu e apretzadu non
solu in Nugoro e in sa Sardigna intrega, ma puru in sas ateras nassiones
mescamente pro s’impignu in su comitadu de s’Europeade
A che lu connoschere in sa gloria santa!
