S’abboju pro sos ''Limbazos''
di Gerolamo Squintu

////////////////////////

Dal Messaggero Sardo N° 6 - Giugno 2010

//////////////////////////

Med’abberu est piaghidu a totu sos chi bi sunu accadidos, in pius de chentu (poetas, iscritores, istudiosos, giornalistas, isulanos e de su Continente) a su cunveniu intituladu “Limbàzos”, fatu pro faeddare de sas limbas de sas minorias. Comente menzus non si podiada l’ana organizadu sos dirigentes de su Premiu de poesi Città di Ozieri de literadura sarda. At collaboradu s’ANPOSDI (Ass. Naz. Poeti e Scrittori Dialettali d’Italia). Appuntamentu in Olbia in su Geovillage. Pro sa zittad’e Terranoa an fatu sos onores de domo su Sindigu Giuanne Giovannelli e s’assessore Paolo Calaresu, otieresu isse puru. Ambos ana esaltadu s’impoltanzia de custa iniziativa. Sun’istadas duas dies piena de cunfrontos, relascione recitas, faeddos. Ana illustradu sas bideas e sas operas insoro una chimbantina de autores. Bi fini pur sas poetas sardos Cristiano e Tetta Becciu e Giuanna Maria Lai de Otieri, Antoneddu Bazzu, Antoni Brundu, Gonariu Carta Brocca, Giulio Chironi, Giuanne Franziscu Garrucciu, Maria Teresa Inzaina, Giuanne Piga, Maria Sale, Innaziu Sanna, Anna Cristina Serra, Zuseppe Tirotto.
«Tottu est servidu pro leare onzunu una pius cunbinta cussenzia ’e sé – narat su segretariu de su Premiu Ozieri Antoni Canalis –.
Amus cumpresu chi oe pius de eris est nezessariu de difendere e valorizare sos limbazos nadios comente unu cumone patrimoniu de zivilidade e de cultura universale».
Est sa prima olta chi s’abboju si faghet in Sardigna e sos risultados sun’istados meravizosos. Pius de un’istranzu si ch’est andadu cun sas lagrimas in ojos ma cun su coro in cuntentesa pro sa bellesa e sos profumos de sa cara isula nostra e sa gentilesa de sa zente sua, che at mustradu intelligenzia e disponibilidade pro chi sa cultura appat a faghere sos populos in onzi momentu sempre piu unidos, che frades carrales.
«Est’istad’un’atera occasione propizia pro ammustrare a su mundu sa antigora identidade nostra – at prezisadu Nigola Tanda – in d’unu confrontu sinzeru cun sos problemas in cumone pro sa salvesa de sas culturas minoritarias chi sun fundamentu de onzi sapidoria, mancari puru sgattende interessos e solusciones bonas pro totu».
Sas relasciones pius importantes l’as an tentu sos professores universitarios Nigola Tanda de Tatari, puru presidenti de s’Otieri, e Marcello Teodonio de Roma chi at leadu su tema “Co’ la lingua, Luscìa, se va in Zardegna”. Momentos bellos de allegria cun sa musica e sos cantigos de su gruppu etno-rock otieresu “Sandalia”. Zoccos de manos senza pasu, de pius in piusu cando han cantadu “Nanneddu meu” e “Non poto reposare”. In sala fini espostas parizzas isculturas de linna dedicadas a su mare obera de sos artistas Nigola e Danilo Sacco.
Giros in Costa Smeralda e in sa zona industriale de Chilivani (assegus de s’ippodromo) pro visiare sas buttegas artigianas de sos frades Pinna chi faghen panadas, suspiros e amaritos e tantas atteras licanzia de Logudoro e de Franco Miscali e Franzisca Squintu che tribagliana cun finesa e arte meravizosa sas milli calidades de sas pedras de sa Sardigna (e non solu). Zente incantada dae s’arte e sas capazidades de sa sarda zenia.
A pustis totu a Ardara pro sa Santa Missa zelebrada dae su parracu Don Eugenio Cocco in sa antiga e sempre pius bella basilica de Nostra Segnora ’e su Regnu chi cunservat unu de sos siddados de s’arte pittorica sarda, Sa Pala ’e s’altare de su Chimbichentos. Onzi poeta at legidu un’intenzione improvisende una quartina in sa limba sua e cun sos divotos chi ana aggradessidu cun piaghere. A sos furisteris, istranzos-amigos, sos ardaresos ana offertu sas rosas beneitas e su “pane de Santa Rita”, ga fit pur sa festa sua.