Su
monte de sa morte de sa vida
di Gonario
Carta Brocca
Trista de me si morzo impenitente!
'Itte dolore, 'itte pena e ghitt'anneu
e ghitte contos l'ap'a dar'a Deu
de custa mala vida chi apo fattu
.
Sos versos de custa grobe chi cantāt sa
biada 'e mammai, cando fit galu bia e sana, semper prus a ispissu,
in custos urtimos tempos mi torran a sa mente. Dae carchi mese apo
jumpau sos novant'annos e su pessamentu de morrere lassande sa veridade
isticchėa in cussa perca, mi dat prus dolore de cantu mi nde dane
sos males minudos. Fortzis ap'irballau tando, o fortzis so irballande
como
. Ma a s'edade mia si timet prus su zudissiu de Deu chi non su
'e sos omines. Su dubbiu, sa timoria, sa 'irgonza, semper m'an abbolattau
sas nottes, ma como chi su riu de sa vida mia est torrandeche a mare,
non mi la sento prus de mantennere custu pesu mannu in su coro. Ispero
solu chi servat a ponner a pessare sos benidores.
Aio sett'annos, tando. Chin su restu de sa familia che fimis in sa
cuilarza de Toddeėto, inue, una tropa de disamparaos che a nois, piccān
tazos de crapas e carchi paru de porcos chi nos toddian sa gana. Fipi
su 'izu mannu e, mannu fit s'illeviu po babbu miu, chi azuao su manzanu
chin sos crapittos, pustis derettandeche sas crapas a sa leada, battunde
s'abba chin su molente e a su sero collind'a pare sas bestias a sa
mandra.
No isco comente apo fattu cussu manzanu maleittu, cando su pe' m'est
fuiu e che so' ruttu in unu treminėle a pittu de una matta 'e lidone.
Non zughio zassu de sa carena chi no esseret arraschiau, ma su dannu
prus mannu fit in su bratzu mancu. Ambas canneddas fin truncās e unu
de sos ossos aiat pertuntu sa purpa e bessiat a foras de sa pedde
paris chin unu tzirittu de sambene chi, prus de s'ossu, mi mintiat
unu disisperu illaganau. Mantenendemi su bratzu malaidu, ruende e
torrandemi a arritzare, fipi torrau a cuile. Mammai, bidendemi comente
chi m'aret appenas iscappau s'astore, azomai s'it drimajā. Derettu
s'aiat fattu fortza e m'aiat meigau ma su sambene sighiat a falare,
che funtana pustis d'una temporada. Su sole fit galu bassu in pittu
'e mare e babbai, chi depiat vaidare sas crapas, po chi no intraren
a sa propiedade, ne a sos pasculos de sos bighinos non torrāt intas
a borta 'e die. Tilippu e Angheledda, de chimbe e tres annos, mi pompiana
chen'aere su corazu de s'accurtziare e parian derettu a iscapparen
a pranghere paris chin megus. Sa caentura aiat cumentzau a m'abbolottare
e a mi faghere e andare in caminos de dolorosu dilliriu. Mammai no
ischiat anue iscudere sa conca. Tando aiat fattu cuss'azardu chi tantu
patimentu nos diat aere causau. Ma cale mamma non diat azardare po
sarvare sa vida de unu fizu chi cret in perigulu?
Posta sa sedda a su burricu, mi nche aiat fattu sere e fimis partios
a bidda po chircare unu meigu chi aret torrau su colore 'e sa cara
a mimi e tranquillizau a mammai. A tilipeddu chi fit su mannu, l'aiat
racumandau de non si mofere dae cuile po perunu mutivu e de avisare
a babbai de sa malasorte chi nos fit capitā. Ma, non fidandesi de
su tottu de frade miu, sa poverina aiat postu una preda bianca a froma
de pudda in dainnantis de sa 'enna 'e su pinnettu: fit su sinzale
po cando depiat partire a bidda chene nd'aere allegau chin su maridu.
Babbai, comente a donnia sero ch'aiat recuiu sas crapas a sa mandra,
las aiat murtas e fit ghirau a cuile chin sa lama de su latte. In
sa 'enna aiat bistu sa pudda de preda e aiat cumpresu su messazu chi
sa muzere l'aiat lassau. Su chi non cumprendiat fit su fattu chi mancaren
tottos tres fizos. Tando, istragu e famėu comente fit, chin s'iscurigada
zai 'ettand'umbras e chin atteras umbras galu prus mannas in su coro,
fit partiu a bidda. Intas como, po mi lu pessare, intendo un'erpilėu
d'astraore chi paret chi m'aperzat s'ischina.
- Ello sos pipios solos as lassau!
- Aiat abboghinau mammai bidende
su maridu intrande a domo, isarvulėu e iscazau in suores, intas si
fimis in su coro de s'ierru.
- Sos pipios?
. - Aiat rispostu issu, falandesi che mortu in sa cradea.
- Non che los as pigaos tue?
. -
Sa dirgrassia mia fit isparia comente po incantu e un'attera, meda
prus manna, aiat bestiu de dolu sa domo nostra.
Babbai, s'aiat buffau un'eccantu de caffč e fit torrau a partire a
cuile, paris chin duos tzios, po chircare a Tilippu e Angheledda in
s'iscuru mumuttu de su monte. Nen cussa notte nen sas dies e-i sas
nottes imbenientes nos aian torrau sos duos pitzinnos. A mimi non
m'essiat piulu ca fipi cumbintu chi esseret tottu curpa mia; si cussu
manzanu non fip'istau ruttu, fradigheddos mios fin istaos in cuile
bivos e sanos. Mammai, no l'arrimāt unu mementu de pranghere, faghendesi
garriu issa puru de una curpa chi no aiat e babbai dimustrāt atterettantu
disisperu, pranghende a s'iscusiu e gettandesiche menettas a corpus:
menettas terribiles de samben e de morte.
In custa terra de predas, chi allattāt sos fizos suos chin lua, chin
samben e bisonzu, sa morte muttiat morte e s'onore, cantu su dolore,
ispettāt sas vittimas de su sacrifitziu chi non podiat mancare, pena
su 'e no essere cussideraos prus omines. In unu mundu de furas e prepotessias,
solu sa fortza, s'atrivimentu e sa venditta fin sa paraulas chi tando,
mannos e minores cumprendiamus. Un'omine chi non si faghiat rispettare,
non podiat bivere in mesu de omines chi s'apprettu e s'innorantzia
rendiat che lupos.
Si frades mios fin isparios dae cuile, chie che los podiat aere pigaos?
Solu cuss'anima maleitta de Leppa 'E Brunzu, narāt babbai. Solu issu
l'aiat odiu, po cussa 'orta chi l'aiat isparau cando, chin su fradile
aian tentau de che li furare sos crapittos dae sa cherina. Issu fit
e issu depiat pagare. Sambene po sambene, dolore po dolore
.
No isco chie l'aiat azuau. Jeo fipi minore e tzertas cosas las manteniat
in secretu.
Sa neula de s'odiu fit falā a domo nostra, ispartinandesi che iscurosa
pantama incurruttā, chi estiat umbra e pore in tottu sos caminos de
'idda.
Pustis de carchi chida chi frades mios fin isparios, aian agattau
a tziu Leppa 'E Brunzu mortu dae duas fusiladas. Quasi a costazu suo,
su fizigheddu de nov'annos, mortu issu puru dae su prumu de sos dimonios
de sa venditta. L'aian agattau chin sa cara a terra, chin sa uca prena
de pruere, ispapattau, comente chi non bastaret a crere chi omines,
dinnos de tale lumene, aren pottiu istruire sa vida sua. Si mi pariat
prus che zusta sa morte de su mannu, mancu tando soe mai resessiu
a cumprendere s'odiu o su disisperu de babbai chi ch'aiat toddiu sa
vida a un'innossente cuasi fedale miu.
S'umbra orrorosa de sa morte pariat chi esseret bennia a bivere po
sempere chin nois. A de notte aiao malos bisiones, inue caligunu mi
siziat chene pasu, chin francas puntzųdas che-i cussas de s'astore.
Cando mi tenian, mi pariat de intendere milli sazos punghendemi sa
carre
e su sambene, unu riu de sambene, inundare su monte e tottu
sas domos de bidda mia. Pustis mi pariat de che falare in un puttu
chene 'undu, inue ruėo, ruėo, comente fipi ruttu sa die chi m'aiao
truncau su bratzu e tottu torrāt a cumentzare dae nou. No aiao mancu
su corazu de 'essire in bidda ca jeo ischio una veridade chi atteros
non ischian o faghian finta de no ischire.
"Sambene muttit sambene".... Narān sos mannos de tando e
sambene fit istau.
Atteros meses fin colaos. Su bratzu miu fit sanau e fipi torrau a
cuile chin babbai. Mamma mia, tra su dolore de sos fizos minores e
sa timoria de sa venditta s'it irmalaidā e fit rutta in un'ispessia
de limbu chene godimentu e chene dolore, inue sas fritzas de sa vida
no la podian ferrere prus.
S'ierru che fit colau e sos primos caentes beraniles aian cumentzau
a mudare de 'irde nou sas chimas de sas elighes. Fit un'impuddile
praghidu. Sos tuturreris fin cumentzande a recuire e sas primas grundines
pigān su post'issoro in su chelu chi andāt intinghendesi de purpura.
Mes'ora innantis d'arveschere mi nche fipi pesau chene ch'ischidare
a babbai ca mi pariat d'aere intesu ischimuzu in s'ala de su edėle.
No aiao agattau nudda de istranu, ma bistu chi che fipi in terra,
m'ipi dau a controllare sas praderas chi aiamus postu po marzane.
Una ch'aiat tentu unu grassile e, fipi intertesu a torrare a parare
su traste, cando una mesu dosina de fusiladas m'aian fattu brinchiare
dae s'assugonzu. Sas iscoppettadas benian dae su cuile. M'ipi affatzau
in pittu d'atta, chircande de iscopiare ghitte b'aiat capitau e ch'aio
'istu a babbai ruttu, cara a chelu. In sa camisa l'aiat froriu una
rosa de sambene chi s'it isparta a tottu sa carena, imboligandelu
in un sudariu orrorosu. In s'ala sua duos omines in berveghina niedda
chi li moffian sa conca chin sas cannas de sos fusiles, controllande
si fit mortu. Una timoria prus manna de su dolore po sa morte de babbai
m'aiat pigau sa conca e sos pese e aio cumentzau a currere in sas
predas de carchina de Toddeito, chen'ischire anue andare nen ghitte
chircare. M'aian frimau sas undas de su mare de Ilune e tziu Liboriu
Canette chi inie aiat sa cuilarza. Isalenau, suorau, chene 'oghe e
chene prus lagrimas in ogros, aio perdiu su sensu de s'ispatziu e
de su tempus. Cando fipi resessiu a ispirigare carchi paraula aio
contau de sos mortores e de babbu miu, lassau in su ruttorzu a canes
e a corvos.
Nemos aiat pagau po sa morte de babbai. Si puru m'it passiu chi sos
duos esseren sos fizos de tziu Leppa 'E Brunzu, sa zustissia no aiat
dau perunu pesu a sas paraulas de unu pippiu che a mimi. Ne mai ap'ischiu
si su manzanu mi l'ap'iscampā ca 'ipi compudande sas trapulas o ca
sos mortores m'aian chertu lassare bivere.
Atteros meses e annos fin colaos. Su bisonzu de domo, fit de cussos
chi non mi permittiat de arrumbare disabųdu.
A bindigh'annos, chin su travallu miu e chin s'azudu de sos parentes
e amigos m'aio fattu unu tazu de crapas chi mi daian pane e aunzu,
faghendemi tirare a dainnantis. In su propiu monte malinnu chi dispensāt
sa morte e-i sa vida, aio eredau sa cuilarza de sos mannos e sos bighinos
m'aian atzettau chin paraulas e fagheres. Unu sero chi fipi remuninde
sas crapas a sa mandra, Sonajolu, su cane miu prus abizosu s'it dau
a zannire comente chi ch'aret pesau a sirvone. M'ip'accurtziau e aio
'istu s'animale puntande unu coladorzu in costas d'atta, carrarzau
dae una matta de tenniperu. Fit unu culumberi istrintu inue azigu
che colao. Sa curiosidade fit manna, che-i sos bindigh'annos mios.
Imbolā tasca e berveghina fipi intrau a pāmpalas a sa rutedda, imazinandemi
chissai cale iscusorzu. Su chi aio 'istu, m'aiat torrau insegus de
ott'annos, mintindemi in su coro, che a tando, sa morte, s'impotessia
e su disisperu. Duos cadavereddos oramai torraos a ossos fin inie,
galu settios, istrintos in s'urtimu abbratzu. Aio connottu sas cartzas
e sa camisa de Tilippu, s'attera jughiat sa teteledda de Anghela.
Prus mi los pompiao e prus mi pariat de los bidere, cussu manzanu
maleittu, bessinde dae cuile, fortzis po joviare a babbai, pustis
perdendesi, disisperandesi e pranghende e tando istringhesi a pare
po si toddere sa paura e su frittu chi siguramente los aiat mortos
a duos passos dae cuile.
Tziu Leppa 'E Brunzu, su fizu, sos parentes issoro, babbai, mammai,
cantu patimentu e cantu odiu debadas
.
No apo mai contau a nemos custu fattu, po mutivos chi bene si poden
cumprendere. Tilippu e Angheledda son semper arrumbaos in cussa rutta,
inue colao donnia tantu a lis zughere unu lizu areste o unu mattu
de cuccumiai.
Su monte de predas de carchina, nos aiat dau sa vida ma aiat pretesu
unu sacrifitziu de samben innossente chi sos fizos suos, tentaos a
famene e disisperu e armaos dae un'onore cainu, l'aian dau chene be
pessare duas bortas.
|
