Tantos annos faghet in bidda, su mese de maju fiat giamadu su mese prus bellu de s’annu. Sas dies mannas e solianas intzitaiant sa gente a fàghere sas bellas iscampagnadas. In su mese de maju, sa lughe de s’amadu sole cumintzaiat a iscardire sa terra e-i sas palas des sos massaios chi traballaiant sa terra. Sa campagna pariat prus bia, ogni cosa pariat diversa, prus allegra e colorida chi faghiat prus bella sa vida. Pariant prus bellos puru sos muros de pedra chi serraiant sas cortes de sas domos. Tra una pedra e-i s’àtera si bidiat carchi tziligherta frimma pariat isetende chissae ite o forsis si fiat assoliende. In tzertos tratos de muru, bi creschiant piantinas arestes sena lumine chi daiant frores a tapeto, gasi pro cherrer bestire carchi prammu de cussa pedra antiga nuda e rutza.
Maju est su mese de sos frores. In bidda bi fiat tia Nineta, chi pro sos frores bi perdiat su sennu de sa conca, totu in tundu a sa domo sua bi teniat una corte manna serrada a muru, contra a su cale a parte de intro, a longu a longu, largos istrisciones de terra fiant piantados a frores de ogni
tipu : rosas, litzos, gravellos e àteros frores de maju chi fiant una bellesa a bidere. Tia Nineta, sa coltzita, si retziat male in pès suos, fiat unu pagu rassita e iscarrucada. Fiat una fèmina de bona famìlia, meda devota a Nostra Signora de su Rosariu, ogni annu, in su mese de maju su praghere sou fiat de frorire s’altare de crèsia, in onore de su mese marianu.
Pro podere mantennere sa prommissa sua, bi teniat una pitzinna chi li serbiat de batidora de abba. Fimis in sos annos 50’, in cussos annos nisciunu bi teniat s’abba in domo. Sa gente andaiat a leare s’abba a sas funtaneddas publicas chi fiant piatzadas una allargu dae s’àtera pro su bisongiu de sa populatzione, tia Nineta, addolorida comente fiat semper, pagu si podiat movere. A sos frores serbiat s’abba manzanu e sera, pro los pòdere abbàre, in cambiu de carchi petzitedda de casu, custa pitzinna ogni santa die, a manzanu e sera, deghinas e deghinas de bortas andaiat e torraiat a sa funtana pro che li giughere s’abba netzessaria.

Su cantaru prus acurtzu fiat unu pagu a in foras de sa bidda. Cando s’andaiat a leare s’abba, tocaiat de isetare su turnu sou pro podet prenare s’istergiu, broccas e padeddas. Sa pitzinna, non s’impressaiat, fiat pitzinna meda e si leaiat su tempus de giogare cun sas cumpangias chi intopaiat in su cantaru pro brincare cun sa fune. Cando si nd’ammentaiat poniat sas duas broccas a prenare e poi una brocca in sa manu e una apogiada in su chintu s’incaminaiat a se tia Nineta. Sa gente chi la bidiant passare in su caminu li nàraiant: - A ti moves pitzinna, tia Nineta t’est isetende, ohi, coro meu, già ti los est lampende duos frastimos, dannant s’anima puru a su diaulu. - Tia Nineta, bon’ànima, teniat bonu coro e fiat fèmina de crèsia, ma fiat puru sa prus frastimajola de sa bidda, totus l’ischiant, ma pero’ ogni annu in su mese de maju fiat issa chi, a crèsia giughiat sos prus bellos frores chi poniat a sos pedes de Nostra Segnora de su Rosariu, cun tota sa devotzione sua.