|
Ogni notte sa matessi ‘isione: una
idda populada solu da pitzinnos ………!
Una idda chena iscolas ……… chena antzianos chi ti
naran a dogni momentu su chi deves faghere.
Cussas bisiones las ap’aer tentas nessi milli oltas e, a su
manzanu, appenas pesadu dae su lettu, non bidia s’ora chi esseret
arrivada sa notte po torrare a bisare.
Fuit una die ‘e atunzu, de cuddas dies neulosas e frittas chi
parian fattas apposta po fagher bistare male unu pitzinnu. Deo a cussos
tempos tenia undigh’annos, ma cussa die no l’apo a immentrigare
mai.
Fui azuande a babbu a fagher faschias de mandra; issu segait a cavanzolu
rampos longos de tirìa, e deo, a mala gana los assettiai, prontos
a los prendere. Ma appena issu si girait mi ponia a giogare cun su
cateddu o a tirare pedra a sas albeghes. Babbu mi chischiait a sa
bona e narait: “Ajò Frantzì’… atteros
duos rampos e mo ch’andamos a bidda”.
Ma in conca mia bi fuit semper cudda ‘isione: una idda de pitzinnos,
chena babbos chi ti che lean a campagna e chena mastros chi ti obbrigan
a fagher compitos infadosos.
Ma su chi disizzai de prus fuit de no intender cussas domandas maccas
chi mi faghian tantas boltas: “Ite cheres fagher cando ses mannu?”
Cussu fuit su chi mi daiat prus infadu! Ca a mie, de diventare mannu,
no mi nde frigait propriu nudda.
Po cale motivu devia creschere? Po diventare pastore e passare sa
vida fatt’a unu rugu ‘e albeghes, mulghere e fagher faschias
de mandra?
O istudiare po diventare mastr‘e iscola e passare tottu sas
dies accorradu a desegus de un’iscrivanìa? .......Mezzus
addurare pitzinnu!
Cun tottu cussos pensamentos, a s’accua ‘e babbu, abellu
abellu che so intradu a su nuraghe chi fuit a facca a sa pinnetta.
Cussu nuraghe l’ia idu chissai cantas boltas!
Però custa olta fuit divressu…… B’iat un’intrada……e
un’essida.
Mi so’ accredadu a s’attera parte e no’ mi pariat
beru.
Da cussa gianna si bidiat una iddighedda tottu colorada, e tantos
e tantos pitzinnos chi giogain’ allegros cun d’unu masone
‘e anzones biancos che su nie.
Sos anzones tranquiglios, chena timer fruschios de perunu mere, chistionain’
cun sos canes tottu paris setzidos sutta ‘e unu prantone in
colore ‘e prata chi giughiat, penduli penduli, ciculates, paninos
imbutidos cun salame e mortadella, tultas, gelatos mannos e botos
de nutella chi nde faghian calare sa baula.
Sas bisiones, cuddas bisiones de tantas nottes…!
Intrande in cussu nuraghe fadadu las bidia a ‘enanti meu.
Fui arrivadu a sa idda inue podia addurare pitzinnu po sempere.
In s’oru ‘e sas albures de prata b’aiat tantas domittas
bildes; tottu de fromma divressa una da s’atera, prenas de giogos
elettronicos de dogni calidade, e pitzinneddos chi giogain’
de continu chena pagare mancu unu soddu.
E deo, setzidu subra unu tostoine mannu chi si fuit offertu de m’accumpagnare
po mi fagher bier sa idda, andai da un’albure a s’atera
mandigande gelatos, paninos cun mortadella e tantos, tantos atteros
drucches chi nd’appo perdidu finas su contu.
Posca mi so accosiadu a una de sas domos de sos giogos.
Fui accantu a bintrare, cando app’intesu unu tochigheddu in
s’ischina e una ‘oghe delicada chi mi narait in s’origa:
“Bintra e gioga cantu cheres, in custu logu no’ si pagat
nudda”.
Mi giro, e a car’a mie b’iat un’anzoneddu ridinde
chi sighiat a narrer: “Bae lestru, innoghe est de obbrigu a
mandigare e a giogare; ma arguai a fagher perunu tribagliu”.
Cussa fuit sa primma olta chi app’intesu un’anzone faeddande.
E po cussu motivu, invece de currer a giogare, mi so postu a chistionare
cun issu.
Poi, curiosu de ischire tantas cosas de cussa idda fadada, apo comintzadu
a li faghere unu muntone ‘e preguntas.
“Nerzet signor anzone, cheria ischire si so in bisione, o si
custu logu esistit de abberu. E si esistit, cantu tempus che poto
addurare?”
“Cantu cheres, caru pitzinnu - at rispostu issu - ma attentzione…
a pustis de unu pagu ‘e tempus s’abertura ‘e su
nuraghe si serrat, e assora deves addurare innoghe po semper”.
“A los bies cussos chi sun giogande? - sighit s’anzone
- A issos puru lis ia nadu sa matessi cosa, ma non b’an postu
cabu e passain sas dies tra albures de drucches e salas de giogos.
Como, finas cherinde, non si che poden prus andare.”
“Est cussu chi cheria ischire - li narzo - mancu deo app’a
mover mai da custu paradisu. Finalmente bi so resultadu: pitzinnu
po semper e chena pensamentos”.
“Deo puru la pensai gai. - sighit seriu s’anzone - Annos
e annos faghet, cando apo passadu s’abertura e so’ arrivadu
a custu logu, no mi daiat coro a mi ch’andare. Deo puru cheria
addurare semper pitzinnu e chena pensamentos.
Za bi so’ resultadu…! No est chi iste male… ma,
a pustis de tantu tempus, sa noia m’est bocchinde: semper uguale,
semper uguale… non bi cresco prus! Fortzis ‘ia fattu bene
a iscultare sos cussizzos de babbu cando fui pitzinnu comente a tie.”
Intendinde cussas peraulas, mi olto, abbaido a cara a su nuraghe…
S’abertura bi fuit ancora… … … Via a totta
fua!
Currinde e pregande chi non s’esseret serrada apo fattu giustu
in tempus…
Babbu fuit ancora inue l’aia lassadu, e ‘iat quasi finidu.
“O ba - li narzo - perdona si non t’apo azuadu; mi che
so’ drommidu in sa pinnetta, ma ti prommitto chi dae como in
denanti, cando no ando a iscola, t’apo azuare dogni santa die.
Antzis, non bio s’ora ‘e crescher po mi occupare deo de
dogni cosa. Gasi tue ti podes pasare.
Eh si, picioccos mios! Da assora, de cussas dies de atunzu neulosas
e frittas nd’app’idu tantas, e como, da ‘esegus
de cust’iscrivania, bos poto narrer chi su nuraghe a facca a
sa pinneta b’est ancora. E inie bi sun semper tottu sos bisos
de cando tenia sa edade ’ostra. Ma po cantas bortas bi so torradu,
sa segunda abertura… no l’ap’ida prusu! Mah, foltzis
est mezus gai!
Foltzis est mezus a crescher… a fagher su mastr‘e iscola
o su pastore e no addurare..... anzoneddu totta vida!
********* (Pedru Pane) |
