BOBORE>>>>>Fit unu jobia e grassias a deus, proghiat.In artu ‘e s’Ortobene, pompiande a sa badde in sas costas chi ghettana a Isalle, Orune fit semper cuche, comente mantesa a mes’aghera ma in su locu suo: una rocca chi essiat dae sa neula.
Supra sa bidda ‘e su bentu, su monte Sant’Andria. Sa paristhoria nat chi in cue si cubabat o si cubet unu dimoniu chi li naban S’Ora mala. Gai malu de che lu bocare finzas dae s’ifferru, e interrau in s’oru e Bitti, fughiu pro si cubare in cussu monte.

CARLO>>>><Mudandesi in omine, accurziabat sas pessones promittinde chi si aian bardanau tottu su chi cherian, nemmos lis aiat pottiu facher mancu punta ‘e pilu, ca los amparabat issu, pezzi li deppian dare s’anima una borta tirau de pedes.
Cando beniat s’ora de aer su chi li deppian, su dimoniu andabat a si che piccare s’anima ma azzapabat sos anzelos chi chircaban de la sarbare.
Custa gherra si cumbattiat chene chi sos omines esseren bidu nudda , sas alas de su diaulu e de sos anzelos, iscudende, pesaban unu bentu potente chi arribabat dae cada pittu, dande pro cussu su zistru a Orune.

MARISA>>>> Lollobe, prus sutta si bidiat a iscuttas. Isvaniat cubandesi che anima mala comente sas nues s’andaban chin su bentu.
Sa neula, isparta che bela si moghiat chene pasu, irfilusada e istramada a tramuntana. Arba ind’unu mare de nudda. Innedda si pesaban sos cuccuros e s’ischina de Mont’Arbu, a istampare su belu, chi pariat una manta de bambache. Dae Marreri a Monte Pizzinnu fit pezzi unu paris chi canzellabat tottu, ingurtinde finzas su caminu chi dae Nùgoro che juchet a Terranoba.

BOBORE>>>>Su mantu in colore aranzinu e sa coa longa chin, in sa punta, duos o tres aneddos de pilu nigheddu falabat dae Farcana. si moghiat animosa in sa caminera, lestra e chin azzicu e timoria ma dezisa. Fit una femina de mariane. Colande iss’oru ‘e sa funtana sichiat a s’imbeniente, sa ‘e Su Lidone, pacu prus in dainnantis.
Ambarduas fin bell’ e siccas ca finzas a sa die non b’ aiat proghiu. Andande a furinu intro ‘e su buscu , oru oru ‘e su caminu, rucrabat su campu de tiru, isperdiu e diruttu , issinde a sa richillia de Sinzale ‘e cherbos: unu quarzu de innida bellesa .

CARLO>>>> <Pompiande a inghiriu isporada, cubandesi in palas de mattas de chessa e de mudrecu, si firmabat : arribaban dae sutta ube b’an sas cussorjas de Jacu Piu, tristos sonos de morte. Issa los connoschiat bene, fin fusiladas.
Ca fit una de cuddas dies chi s’omine, pro su piachere suo e pro nanchi s’ispassiare, jocabat chin sa pedde de sos animales a che los isperdere.
MARISA>>>>>Assagadada, comente esseret appiu un inzertu fit tuccande a un addobiu chi non podiat mancare. Lassada cada duda, piccabat a currere in sa falada, puntande una pratta chin carchi arbore a faghinu. Una borta iss’oru s’andabat semper prus abbellu. Pompiande in artu. Arribada a s’urtimu trettu, passu a passu, si sediat.Firma e muda, sos ocros iffustos, pustis de un’iscutta che l’issiat unu gànnitu longu e tristissimu, comente su prantu de unu pizzinnu disisperau.

BOBORE>> Impiccau a una camba de eliche, insambentàu, b’aiat unu mariane mascru, mortu. Su cumpanzu de una bida, pendiat comente mustra pro sos atteros de sa matessi zenia, gai chi esseren ischìu sa sorte chi lis toccabat.Pranghiat e pranghiat, unu dolore chi non podiat cumprendere, chi non podiat nè narrer nè azzettare. Sichiat a lu pompiare, comente a chircare in cussu corpus bodiu, carchi cosa chi s’esseret moghia, unu sinzale de bida, un alènu.

CARLO>>>> Ma a la torrare a su mundu bi pessaban sos zaffos de una, duas tres fusiladas, sichias dae sa dummida de sas ballas chi si ficchiana in sos truncos che istoccadas.
Timende pro sa bida si ghettabat a fughire. Chind unu brinchiu fit intro ‘e su buscu e iffattu sos canes e sas boches de sos cassadores. Sola, arpilada arrancada e ferta s’azzapabat indainnantis una codìna e in cussa s’apperiat un àghidu. Si che poniat iffundu ind unu cuzzone cubau, muda e su coro a toccheddu.
MARISA >>> Pariat esseret tottu finiu, non s’intendiat sonu.Tottu ind’una s’intrada s’iscuricabat. Unu cane ‘e cassa arraiolau, sos ocros inghisios de sambene, moghiat airau contr’ a issa. Fit perdia e chircabat de si facher cantu prus minore podiat, ma cando su cane fit pronto a l’agganzare a gangulittas si intendiat unu murrunzu, comente unu sorrocru.

BOBORE>>>> << e tando? E Itte male t’at fattu su mariane?>>Ispantau su cane si zirabat mustrande sas dentes a su sirbone essiu dae un angrone pichidu.<<…e deo, itte t’appo fattu?>>
Su sirbone, mùrinu, mannu de carena e de edade, sinzau de fertas nobas e anticas, perdiat sambene dae una cossa, ube si bidian craros sos istampos de sas ballas de su fusile.

CARLO>>> << deo soe unu cane ‘e cassa e bos soe nemicu ca mi sezzis nemicos!>>

BOBORE>>>>>> <<deo soe unu sirbone! non benzo a t’ucchidere mancari non ti tima! finzas a pac’ora fippo mere de zirare sos buscos chene dare anneu nè a tibe nè a sos omines. Non bi ti connosco, comente ti poto essere nemicu??…e credo…chi mancu issa ti connoscat…>>

(Su cane furibundu )
CARLO>>>>>> <<su mere m’at nau chi bos deppo mossere a morte e appeddare forte pro l’abertere chi bos appo tentu!>>.
(A cussas paragulas su mariane essiat dae s’angrone ):
MARISA>>>> << ca tue ses teraccu de s’omine! de tene no at cussideru, ses bibu ca li bisonzas. E si irballas o no ubbidis?>>
(sarcastico)
CARLO>>> <<<<beh tando m’iscudet e mi lassata a gana netta pro una chida. Ma est zustu! appo irballau! carchi borta nde collo ca est imbriacu o ca est nerbosu ..ma issu est su mere! >>

MARISA>>>> <<< itte mere de gabbale est uno chi t’iscudet cando li zirat? ti impreat comente un’arma ubbidasa o mancu, l’as nau tue! ti trattat pejus de nois…chi ucchidet. tue nos ses nemicu ca issu nos est nemicu, l’ubbidis pezzi pro lu cumpiachere!>>

CARLO>>>> <<non t’attrivas a nde faveddare male! deo soe felize chin issu si issu lu est, est un onore l’ ubbidire>>

MARISA>>>>>> <<comente nono, ses cuntentu!. Issies paris, francu sa cassa? e chin tecus jocata beru? T’accasazzat?>>

( su cane prus seriu, pessamentosu, osserbat su sirbone)
CARLO>>>>>> <<no, non bi jocat ca no at tempus. nemmancu mi bocat ca non podet e in domo sua non bi potto intrare. isto paris chin sos atteros ind’una domedda in su cunzau. in cue isettamus chi torret.>>

BOBORE>>>>>> Iffora si ch’ intendian sas boches de sos cassadores chi accurziaban e fruschios pro muttire su cane chi zirandesi a sa luche de s’essia nabat:
CARLO >>> <<mi cheries imbolicare, su mere mi cheret bene>>

BOBORE >>> << a mimme mi paret chi ses tue chi imbolicas a tibe mattessi! Ti cheres cumbinchere de istare bene! >>
(Fit tando chi su mariane chin corazzu si poniat dainnantis a su cane)
MARISA <<<< << Proitte nos deppen ucchidere? Proitte deppimus semper fughire? Proitte su cumpanzu meu non b’est prus? proitte deppo perdere issos puru………? e nandelu mustrabat chin su murru su cuzone ube si fit cubada.
BOBORE>>>>>Ammuntonaos astrintos in cherta de si caentare, appilicandesi s’unu a s’atteru chircande sa titta de sughere, b’aian chimbe animaleddos in pessu naschios.

MARISA>>> <<as mai appiu fizzicheddos?….e una cumpanza?>>

BOBORE>>> Su cane che perdiat sa grista feroze e non mustrabat prus sas dentes. Li si fin iffustos sos ocros de lagrimas, non resessiat a narrer nudda finzas a cando chind unu filu e boche rispondiat:

CARLO>>> <<aìo una cumpanza… nos cheriabamus bene e istabamus bene paris. issa fit prossima, fimus isettande…ma…..>>
BOBORE>>>> << …ma…non b’ at ubbidiu! ….>>
CARLO>>>>>>>> <<..no..>>

MARISA>>>> S’ammudaban e unu marianeddu che roddulabat finzas a sos pedes de su cane. Issu incurbiandesi chin su murru e chin delicadesa che lu torrabat a ispinghere finzas a sa mama. Nasu chin nasu chin su mariane, comente a lu cossolare.

CARLO>>>>> << aias resone, deo non bos so nemicu>>

BOBORE/MARISA >>>>>>>> <<…commo l’ischis tue puru…>>
CARLO>>>> << esso…addobio su mere, che batto sa cumpannia a innedda dae inoche. Non poto facher atteru pro bos azzudare.
Adiosu! m’auguro de bos torrare a bier in salude e in libertade..>>

MARISA/BOBORE <<in bon’ora!>>

BOBORE>>>>>Sichian sos isparos bam bam bam bam, non ‘nde fachian fine, e in prus sos appeddos de sos canes chi aian nuscau sa tratta de sichire e galu bam bam bam.
Aperiat sos ocros in cussu mamentu. Fit supra unu lettu, tottu sudorau, cumprendende pustis chi fit su suo. Bam bam bam, non fin fusiladas, ma calicunu chi fachiat travallos in supra e finzas cussu appeddare sichiu chi ch’irbodiat sos cherbeddos aiat unu numene: Marianna, sa bassotta de dommo l’intonabat a cada marteddada. Pessabat ….<< Ma raiu!…arrazza ‘e bisu! pariat tottu beru, d’esser in cue, marianes, sirbones, canes, e mancu male non bi bibiat!>>

CARLO>>>>>>>>> Su bisu l’aio mantesu in conca unu muntone ‘e tempus, e cando si che fit essinde una borta e pro tottus, gai, unu manzanu prima de intrare a uffissiu colabo a su bar pro irmurzare. In cue sa matessi mimula de cada lunisi: sas partias de fubbalu. M’abizabo chi imbaradas a su bancone b’aian pessones chi animosas fin faveddande de atteru :

BOBORE >>>>> <<Comente diat essere chi non ses pottiu andare a cassa? Proitte?>>
CARLO >>> << oh raios oh!, ma si ti l’appo ripitiu nessi deche bortas! deche bortas!!! Mi c’an furau tottus sos canes, tottus …bae innorommala …tottus!!!>>

MARISA>>>>>>>>>> Sa cosa li bestiat curiosidade: si c’azzocchiabat, abbellu abbellu. Su prus attriviu fit galu nande: <<su chi non resesso a cumprendere est chi che los an furaos secande sa rete! istrazzandela a mossos! una cosa de non credere! ube b’at s’istampu…… a inghiriu de s’istampu, fit prenu de pilu de sirbone e de mariane!…boh?…nazzemi bois…!>> Canteccante non ch’ingurtiat “capuccinu”, zicchera e cuzzerinu. Andau a pacare a sa cassia ridiat in cara a su mere ‘e su zilleri chi lu pompiabat che maccu.

CARLO>>>>>>>>> Essiu pro andare a sa macchina m’intendio pilisau e lepiu chi mi pario bolande. Comente cummoviu, ma imbezzes de pranghere mi tuccabat unu risu maccu e non resessia a lu trattenner. Pompiandemi a inghiriru, pro sa birgonza, non m’esseren bidu, ca su risu mi sichiat e non bi lu podia firmare! E tando cominzabo a ridere a ridere a ridere, unu canu sarbau dae unu mariane e unu sirbone..ahahahahahahahah, ite risu e prus bi pessabo prus ridia, pilos de mariane e de sirbone ahahahahaha ridia, e ridia, ridia, ridia, ridia, ridia…a lagrimas, ridia ridia…finzas a pranghere, a lagrimas…ridende.

1° PREMIO SEZIONE RACCONTI “PREMIO BARDIA 9° EDIZIONE, DORGALI 2018
MENZIONE D’ONORE PREMIO LOGUDORO DI OZIERI XXXVII EDIZIONE SEZ. RACCONTI 2018
IV PREMIO CITTA’ DI OZIERI 2018